الموسيقى في ال 20 سنة اللي فاتوا اتطورت بشكل كبير، خصوصًا مع ظهور الهوم ستوديو وبقى الواحد ممكن يعمل ستوديو موسيقي في البيت بأقل التكاليف، كل اللي محتاجه هو كمبيوتر وينزل عليه برامج، البرامج دي بتعمل كل الأصوات اللي ممكن تتخيلها، من أول الجيتار لحد صوت الحيوانات، ده سهل على الناس إنها تعمل مزيكا من البيت ومن غير ما تكلف نفسها. من هنا اتفتح الباب قدام ناس كتير بتحب المزيكا، زي أشرف زيد المعروف باسم "أبو سهر"، أشرف من المنيا عمل مزيكا من البيت ولفت انتباه الناس اللي بتحب ومتابعة المزيكا، عشان قدر يخلق شكل جديد للمزيكا الشعبي.
"أبو سهر" هو موسيقي ودي جي بيعزف مزيكا على كيبورد الكمبيوتر، كمان بينزل يلعب مزيكا شعبي هو اللي عاملها في الأفراح على العدة بتاعته، اللي هي عبارة عن جهاز كمبيوتر وبس، تقدر تقول بيطبخ المزيكا قدامك و الفرح شغال. نادراً لما أبو سهر بيطلع من المنيا ويروح القاهرة، عشان هو حياته كلها في المنيا، آخر مرة جه فيها القاهرة كان شغال على البومه الأول مع شركة "هز" اللي هي أصلا إنتاج فني للموسيقى الإلكترونية، مقرها ما بين القاهرة وأمريكا، وفي المرة دي قابلت أبو سهر واتكلمت معاه عن مشواره الفني.
إيه اللي دخلك في المزيكا؟
من طفولتي وأنا بحب الأصوات، كنت بستخدم الزرع أعمل بيه أصوات، وعلب الكرتون اللي بركّب عليها أساتك زي الأوتار واعمل بيها صوت يدي لحن، أصلي كنت عايش مع جدي وجدتي في أرض زراعية في المنيا، لا تليفزيون ولا أي حاجة، يا دوبك راديو وبس، وخالي الله يرحمه كان شغال دي جي وأنا لما كنت بنزل إجازة البلد كل يوم خميس كنت بروح معاه الأفراح أساعده واختار معاه الأغاني، بعد كده أنا استلمت منه الشغلانة وأنا في إعدادي.
ازاي وصلت إنك أنت اللي تعمل مزيكا بنفسك؟
"بدأت اعمل ميكس بين الأغاني عادي على الكمبيوتر بالjet audio و mixcraft ولما قابلت واحد صاحبي من الشرقية قالي بقى على برنامج FL studio، كنت بنتج مزيكا أنا اللي عاملها وارفع على موقع "طرائيعو 2009".
كنت عارف أنت عايز تعمل أنهي نوع موسيقي؟
كان بالنسبالي مش مهم هو إيه النوع اللي أنا بعمله، المهم إن الألحان والميلودي تطلع للناس، أنا هعمل اللحن بتاعي بأي شكل ومن غير قوانين، ومن 2009 وأنا بعمل مزيكا على الكمبيوتر وكان كل شغلي إلكترونيك كلها plugins وبرامج. المزيكا اللي أنا بعملها ممكن تكون جديدة بالنسبة للقاهرة والألحان بتاعتي كلها جديدة وكنت بدمج الشرقي مع الغربي وكل حاجة جديدة وكمان ماكنتش مستقر على شكل معين في المزيكا، بعمل مزيكا وبس.
يعني إيه برضه النوع الموسيقي اللي أنت بتلعبه؟
بعمل مزيكا اسمها "تروبي" مالهاش قوانين، مزيكا حرة و بس، وأنا اللي سميته كده، يعني حاجة مافيهاش لا مقام ولا بيت ولا أي حاجة، حاجة كده خيالية لكن الأساس فيها هو الشعبي اللي هو أساس كل الفنون. أنا بحاول أخلي الشعبي يحاكي باقي الأنواع وفي نفس الوقت هتحس إنه كله ماشي مع بعض كبنية واحدة، يعني أنا هحط شعبي مع لحن اتموسفير فضائي في الألبوم الجديد مثلاً.
وجودك في القاهرة اليومين دول مأثر عليك.. الزحمة والناس والكلام ده؟
بص في تراك في الألبوم عملته لما جيت القاهرة وشوفت الناس والزحمة، غير كده ممكن اتأثر بس لو انا سمعت واستسلمت للضوضاء، إنما بمجرد إنك تعزل نفسك خلاص انتهى الموضوع وكمان مش بنزل احتك بالناس، أهم حاجة إن المزيكا بتاعتي مش هتتأثر عشان أنا شغال بنفس المود اللي كنت شغال بيه في المنيا.
إيه الجديد في الألبوم اللي أنت شغال عليه؟
في تراك بحكي مواقف في حياتي. في الألبوم الجديد بغني فيه عشان بعرف أوظف صوتي صح كأنه آلة موسيقية والتراك ده بحكي فيه قصة حياتي، بس بطريقة مختصرة شوية. كمان بحاول أوري الناس إن الشعبي أكبر من كده وألحان ولعب ميلوديز وعلى فكرة هيكون في تراك منهم هيتسجل لايف من فرح حقيقي وغير كده أنا بعمل تروبي مش حاجة تانية
طب إيه اللي وصلك إنك تعزف على كيبورد كمبيوتر؟
ده التطور الطبيعي، أنا كنت بعمل مزيكا بالزرع والكرتون، الوضع تطور وبقى كيبورد كمبيوتر، فقولت أنا ليه مااستغلش الكيبورد كأنها آلة موسيقية زي الأورج، وأنا عشان أقعد قدام أورج لازم أكون دارس مزيكا وأنا مش كده، أنا معتمد على البساطة مش التعقيد.
هل الإمكانيات مشكلة؟
لما تفكر في المزيكا اللي طالعة من وجه قبلي، كل اللي هييجي في دماغك المزمار الصعيدي بس، ولما بيكون في حد بيعمل موسيقى مختلفة بتكون النظرة ليه نظرة واحد مستشرق بيكتشف الصعيد وبيستغرب ازاي المزيكا دي طالعة من المكان ده، باعتبار إن الصعيد صعب يطلع فيها أنواع موسيقية مختلفة، الغريب إن الخواجة هو اللي يشاور ويقول إيه المزيكا دي اللي طالعة من هنا دي؟
