من وقت ما المهرجانات
ظهرت في مصر وهي بقت جزء أساسي من الحياة اليومية للمصريين. ملايين من البشر كان
بيتم تهميشهم، لقوا نفسهم في المزيكا دي وحسوا إنها بتعبر عنهم وعن حياتهم وعن مشاكلهم،
وبتتكلم بطريقة مشابهة للطريقة اللي هما بيتكلموا بيها. المهرجانات نجحت ووصلت لكل
مكان واخترقت كل وسائل الإعلام الجديدة والقديمة. وتقديرا مننا للمزيكا دي ونجومها
والنجاح اللي حققوه، عملنا تعاون مع أنغامي عشان نرشحلكم 10 فنانين مهرجانات لازم
تتابعهم في 2020.
أبو الشوق
أبو الشوق واحد من نجوم
المهرجانات اللي ضربوا في 2019، بسبب أغنيته "دنيا المراجيح"، ولسه سكته
سالكة وطريقه أخضر في 2020. من العوامل اللي ساعدت في نجاح أبو الشوق هو تعاونه مع
نجوم مهمين في المجال زي حمو بيكا وفيجو الدخلاوي، واختياراته للمواضيع، زي مثلا
ما عمل أغنية لفيروس كورونا.
عنابة
عنابة عرفناه لأول مرة
في نهائي مسابقى نجوم المهرجان سنة 2018، وكان معاه وزة منتصر, بعدها عنابة عمل
أغاني لوحده كتير، آخرها كان "عالم الجريمة" مع البروديوسر المعروف
مولوتوف.
شبرا الجنرال
منقدرش ننسى واحد من
أكتر الناس الموهوبة مؤخرًا في المجال. شبرا الجنرال ماشي ببطء لكن بثبات وبيسيب
بصماته على مشهد مليان لاعيبة، بأغانيه المختلفة والكليبس بتاعته اللي هتعلم مع أي
حد يشوفها.
الصواريخ
اسمهم الصواريخ وهما
صواريخ فعلا. لو ماسمعتش مهرجان "لأ لأ" من سنة 2017، فأنت أكيد كنت
عايش في مغارة أو مش في مصر. ثنائي الصواريخ مكملين وهيسمعونا حكم ومواعظ جديدة في
2020.
عصام ساسا
عصام ساسا واحد من أهم نجوم المهرجانات اللي سمهم طالع،
وحجز لنفسه مكان وسط سميعة النوع ده من المزيكا. في 2020 العين هتكون على ساسا
وكله مستني منه حاجات أكتر.
علي سمارة وأحمد عزت
أحمد عزت كانت بدايته في عالم المزيكا تقليدية، أغاني
رومانسية مع شركات كبيرة زي روتانا. بس بعد ما "عزت" قابل
"سمارة" قرر يحول كاريره لعالم المهرجانات وسجلوا مع بعض أغنية
"شايف الوشوش ألوان"، واللي ركبت التريند لفترات طويلة وهتعيش مع
"سميعة المهرجانات" سنين قدام. استنوهم تاني بقى في 2020.
ريشة كوستا و سمارة ناو
الاتنين اللي قدموا لعالم المهرجانات أغاني فرقعت زي
"سيبوني في حالي بقى" و "هو اللي مجنني" السنة اللي فاتت،
جاهزين في 2020 عشان يعملوا حاجات أكبر.
الباور العالي
اسمهم على مسمى، هما باور عالي فعلا وبيقدموا مهرجانات
فرز أول دايما وبيركزوا كمان على إنتاج محتوى فيديو قوي، يبيع المزيكا بتاعتهم
أكتر ويخلدها مع الجمهور. الباور العالي لسه هيزودوا الفولت في 2020.
كزبرة و حنجرة
من أكتر الناس اللي
عندهم كاريزما وجماهيرية في الوسط ده، لو مش هتحب مزيكتهم فأكيد هتحب فيديوهاتهم
وهتضحك عليهم وهتنبهر بطريقتهم في الغنا ونطق الكلام. الثنائي ده خلوا عنيكم عليهم
في 2020.
أحمد موزه
أغنيته "ضربة
بضربة" كانت هي اللي ضاربة في أواخر 2019. في 2020 مستنيين منه كتير، سواء
أغانيه السينجل أو حتى المشاريع الكبيرة اللي ممكن يشارك فيها.
