من حوالي سنتين حد من زمايلي الناشطين في مشهد الموسيقى الإكترونية سمعني تراك بعنوان 'خبطة' من توزيع شخص مجهول اسمه "حدايق ٣٠٣". في الوقت ده كان التراك متداول داخل دايرة الدجيهات وموزعين الموسيقى الإلكترونية في القاهرة. كانت أول مرة أنا وناس كتير غيري تسمع حاجة بالشكل ده، أول مرة الشعبي والموسيقى الإلكترونية، أو الخبط بالعامية، يتداخلوا بشكل واضح في تراك واحد متناسق، بيجمع إيقاع الشعبي مع أصوات الacid والتكنو. التراك ده في عدد كبير من الناس اعتبرته نقلة، مش بس عشان كان يعتبر تطوير لصوت المهرجان والشعبي، لكن عشان كان إثبات لقابلية الشعبي على الاندماج مع ألوان موسيقية مختلفة.
مع مرور الوقت حدايق ٣٠٣ (الاسم الحقيقي أحمد أشرف) بقى معروف أكتر باسم مولوتوف وأنتج عدد كبير من التراكات على نطاق أنواع كتير من الموسيقى واسمه توغل في عالم الراب والشعبي والموسيقى التجريبية. مولوتوف اشتغل مع أكبر نجوم المهرجانات والهيب هوب، زي سادات وعلاء فيفتي ومروان بابلو. أشهر تعاوناته كان مهرجان 'بلعب أساسي' مع علاء فيفتي اللي وصل لأكتر من ٢٤ مليون مشاهدة على اليوتيوب، مهرجان 'الكيف' و'السيرك إتنصب' مع سادات وأغنية 'الجميزة' و'جيب فلوس' مع مروان بابلو. غريب إن مع كل النجاح والقواعد اللي كسرها شاب عنده ٢٣ سنة زي أحمد، مايكونش في حوار معاه أو اهتمام بقصته، فأنا قررت إني أروح أقابله في الستوديو بتاعه في حدايق حلوان وأعرف عنه أكتر.
احكيلنا عن خلفيتك.
أنا من هنا (حدايق حلوان). درست في مدرسة العائلة المقدسة في حلوان، خلصت وبعدين دخلت ديكور الأول عشان المجموع، بعدين حولت معهد سينما بعدها بسنة. اشتغلت في المونتاج في كذا شركة وبعدين اشتغلت لوحدي (فريلانس) وفي الآخر سيبت الموضوع عشان لاقيته سخيف. كنت هبتدي أخش في سكة الإعلانات بس قررت أفكس.
قبل ماتعمل مزيكا أصلاً كنت بتحب تسمع إيه؟
راب كدة كدة.. الكلام ده كان في 2011 مثلاً. ساعتها كنت بسمع حاجات كتير زي علي طالباب وبتوع الشام برضه. غير الراب بقى كنت بسمع تكنو لناس زي Ben Klock و Regal و Boston 168.
إيه الخلاك عايز تعمل مزيكة أكتر، الراب ولا التكنو؟
الراب. و بعدين بقى لما إتسحلت على Ableton حبيت المزيكة أكتر، و في نفس الوقت كنت بسمع مهرجانات بس اللي هو العادي فاهم؟ و بعد كدة في 2011 أو 2012 شوفت الفيلم بتاع الكترو شعبي (Electro Shaabi). بس ف لما إتفرجت عليه اكتشفت ان في عالم إبن متناكة و أنا مسحول فالراب والتكنو و دي حاجات مش فالثقافة بتاعتنا.. و هو الحوار أهو (هنا) أصلاً. إتسحلت بقى فالموضوع نيك و قلت أنا عايز أعمل مزيكة فالسكة دي.
أول مزيكا عملتها كانت إيه؟
أربع تراكات كدة لسه موجودين عندي على Soundcloud، اسمهم "مربع الحماحمة"، "مربع المولوتوف"، "مربع النخل" و"مربع الثورة". كانت لوبس مهرجانات كدة، تراكات مافيهاش توزيع أوي.
إيه بقى اللي خلاك عايز تعمل تراكات أكتر من المهرجانات العادية أو فيها عنصر موسيقى إلكترونية بارز؟
الفكرة دي جاتلي من زمان. عشان أنا أول مزيكا عملتها كانت تكنو. لما اتسحلت في المهرجانات وبقيت بسمعها كتير، وخصوصاً ال loops القديمة، لاقيت فيها نفس فكرة التكنو اللي أنا مسحول فيها بس واخدة شكل مش إلكتروني أوي. فأنا لما لاقيت العنصر ده موجود أصلًا حبيت أزوده.
اسم حدايق طلع امتى؟ بعد مولوتوف ولا قبله؟
أنا بدأت أشتغل باسم "مولوتوف"، بس كان في مشكلة في الاسم من ناحية السيرش وكدة عشان متكرر، فكرت بقى في اسم تاني، وبدأت أنزل تراكاتي باسم "حدايق".
و إنت شايف إيه أكبر فرق بين حدايق و مولوتوف؟
حدايق كان إنسترومينتال بس، مش عايز حد يطلع يغني معاه.
احكيلنا عن أشهر حاجة عملتها.. "بلعب أساسي" مع علاء فيفتي.
أنا قابلت فيفتي أول مرة في شركة "١٠٠نسخة" واتعرفنا على بعض واشتغلنا تراك في ألبوم "نجوم المهرجان" اسمه "شلا بلا". بعدها فيفتي كلمني وقالي احنا عايزينك في تراك وروحتله مدينة السلام وقعدنا أول يوم نتكلم أكتر، تاني يوم روحتله عامل جزء من الbeat، بعد كدة روحت خلصت التراك وبعته وراح منزله.
ده أكتر تراك جايب مشاهدة بالنسبالك.. كنت متوقع يفرقع كدة؟
لأ خالص، ماكنتش متوقع حاجة، أنا كنت مسحول في الموضوع نفسه. ماكنتش بفكر في التراك هيعمل إيه.
إيه النقلة اللي حصلت في شغلك بعد "بلعب أساسي"؟
ناس كتير كانت حابة تشتغل معايا، بس أنا طول عمري ما كنتش الشخص اللي عايز يبقى بيشتغل كتير ومع الناس كلها، أحب أكتر إني أشتغل مع حد معين بيعمل حاجة معينة وأفضل أدخل من تجربة لتجربة. بعد "بلعب أساسي" قعدت شهر أو شهرين مابشتغلش غير مع فيفتي، عملنا تراكات كتير منها "آنسني في وحدتي"، "كوكب دخان"، "حالة طوارئ" وعملنا نسخة تانية من "مدينة السلام".
احكيلي عن تراك الجميزة مع مروان بابلو؟
وصلنا لبعض على النت وبعدين اتقابلنا هنا في الستديو بتاعي، اتسحلنا مع بعض في مزيكا تراب عادي. الجميزة أكتر تراك في نفس الحتة اللي أنا فيها من ناحية الفوكال، لأن هو الفوكالز بتاعته مصرية وجديدة والكلام مختلف خالص، والمزيكا اللي أنا بعملها بيكون فيها قصة، فيها حاجة تسحلك.
"الجميزة" واخد من المهرجانات خصوصاً الgroove والأصوات. المزيكا تشبه التكنو والترانس، كلها بايس و303 وسينثات تحسها أنالوج، في منها عناصر من التراب زي ال808 والhigh hats وأصوات في الإيقاع بحطها بطريقة معينة ماتبانش أوي بس تبقى جوه الموضوع، لأنها لو بانت في الآخر مش هيبقى مهرجان، عشان يفضل اسمه مهرجان لازم يبقى في عناصر معينة واضحة، لو الsnare صوته مش شعبي هيبقى حاجة تانية، أو هيبان إنه حاجة بتحاول تبقى شعبي.
عايز تنزل حفلات كتير الفترة الجاية ولا عايز تركز في المزيكا أكتر؟
الصراحة مزيكا أكتر، ممكن يجي فترة أزهق يعني، أنا حاسس مزيكا أكتر دلوقتي، بس برضه حوار الحفلات ده عايز أحطه في دماغي عشان أنا أصلاً مش شخص اجتماعي، بحب أقعد لوحدي في الستوديو اشتغل. يعني أنا بحب السينما فشخ بس المونتاج مش الاخراج عشان كدة. مش عايز أتزاول مع ناس.. بس ده مايمنعش إن أنا عايز أعمل الاتنين، عشان الحفلات أكيد هتساعد إن مزيكتي تتشهر، و أنا برضه عندي كذا فكرة فالموضوع ده. عايز أعمل حاجة فالافراح.. عشان فالفرح مفيش حد بييجي يلعب ساعة و يروح. عايز أعمل لايف شو المزيكة الانا بعملها و ممكن يبقى معايا حد بيغني،
نفسي برضه أعمل حاجة مع حد اشتغلت معاه كتير زي فيفتي أو بابلو أو كدة. نعمل مشروع لوحده ننزل به لايف.. نفسي يبقى عندي كذا لايف شو مختلف، حاجة برضه من غير غنى في حالة حدايق.
عايز توصل لايه؟
مبدئياً أنا مش عايز حاجة توقفني عن المزيكة، بس كدة. و أنا حاطط في دماغي اني أوصل لحاجة فالموضوع ده، بس لحد فين أنا معرفش، مفيش نقطة معينة أنا محددها لنفسي لما أوصلها انبسط. يمكن العايز أوصله اني أبقى بعمل الموضوع بسهولة، يعني يبقى مادياً الموضوع سهل و يبقى في إمكانيات محترمة، و إن يبقى ده أكيد الحاجة البتاكلني عيش و ابتدي انفذ كل الافكار الانا عايزها براحتي. عايز أنتج كتير و اشتغل أكتر. أما بالنسبة لحتة أطلع برة دي أنا كدة كدة باصصلها بس مش مركز فيها دلوقتي، و عارف انها لو هتيجي، هتيجي لوحدها، هما اللي هاييجوا مش أنا الهاوصلهم مزيكتي. أنا أحسنلي أقعد أتسحل نيك و أعمل حاجة بنت متناكة لحد ما هما يجولي. المهرجانات مثلاً نوع جديد من المزيكة بقاله ١٠ سنين و لسة مخدش شكل ثابت في أي حاجة، و لسة مخدش حقه عشان مفيش حاجات كتير حوليه بتساعده. دي حاجة في حد ذاتها كويسة عشان بتدي المزيكة استقلالها بس في نفس الوقت مش صح. مفيش كلوب مهرجانات بس مثلاً، مفيش شركات إنتاج.. مفيش مؤسسات، فاهم؟ مفيش حاجة بتزق الموضوع. لأن الموضوع إنت ممكن تفكر فيه بطريقتين، طريقة الهي البيزنس بنت المتناكة و ده سهل نيك انك تخش المجال ده و تطلع منه فلوس بس هتبقى بتعمل حاجة هلس على خرا على سرقة على مبتقدمش حاجة. أنا كدة كدة مش محتاج كل ده، أنا لسة صغير فا لسة عندي وقت أعمل بالشكل الصح و والحاجات لو ظهرت بالشكل ده هيبقى احا.
تابع مولوتوف على الفيسبوك والانستجرام و الساوندكلاود.
