مقدمة الحوار من كتابة فريق سين نويز. نص الحوار كتبه شمس 200
في بضعة سنوات قليلة أثبتت تسجيلات كفر الدوار نفسها كأحد المواهب المتألقة الصاعدة التي نمت من خارج القاهرة. ما بين إبراهيم إكس, يونس, سوبر مارو, السابع, حمزة, و شاه, تطل علينا تسجيلات كفر الدوار كمجموعة إنتاجية مكتملة الأركان تقدم أعمال متميزة مثل الالبوم المشترك ’يا خال’ بين يونس و إبراهيم إكس.
في وسط كل هذه الموهبة يقف الشاب ذو الواحد و عشرون عاماً - كريم محمد إسماعيل (المعروف فنيًا باسم ’شاه’), وافر الموهبة, العازف على أكثر من آلة, يقف على حياء و هدوء فى ضمن المجموعة.
فعلاقة شاه و مجموعة تسجيلات كفر الدوار ترجع إلى زمن الصداقة القديمة التي تجمعهم من قبل تكوين المجموعة, و لكنه يقف مختلفاً عن زملائه بأسلوبه المميز المعروف بميوله لموسيقى المهرجانات التجريبية التي تمزج بين اصولها المحلية و بين الأصوات الغربية المعاصرة الراقصة و الباص.
و بذكره لكل من القاهريين المعاصرين زولي و موريس لوقا ضمن الموسيقيين المحببين إليه, فإن شاه يتطلع لإنتاج صوت عصرى لا ينفصل تماماً عن هويته المصرية و لكنه في نفس الوقت لا يحتضن تماماً الأصوات الغربية.
الكاتب المساهم ٢٠٠ شمس يجلس مع شاه للحديث عن تاريخه و نشأته و تطلعاته وأفكاره عن مشهد الراب المصري, وغيرها المواضيع العديدة.
في البداية عرفنا بنفسك؟
- أنا اسمي كريم محمد اسماعيل محمد الجمال ، ٢١ سنة ، من كفر الدوار. بدرس في كلية آداب آثار إسلامي، بعمل electronic music, واسمي الفني (شاه)
بحس إن موسيقاك باص ميوزك Bass Music بخليط من المصري والفارسي عموما والعربي كمان، في رؤية معينة في الموضوع ده ولا أنا غلطان؟
- إحساسك صح وده بسبب تأثري الكبير بموسيقى الأماكن دي، كان هدفي من بداية الموضوع قبل ما اعمل السملات اني أوجد الخليط ده وده كان هيتوجد من خلال حاجتين:
(الجمل اللحنية-والايقاعات)
الجمل اللحنية من حيث تكوينها وطول الجملة والآلات المتسخدمة فيها، بحيث إنها تكون electronic متقلبش مني في الآخر ب orchestra music، فكان اختياري لبعض من أصوات ال leads والـ synthesis وأنواع الإيقاعات وأصوات الآلات الإيقاعية الموجودة.
أغانيك الصولو أنضج بكتير من البروداكشن اللي بتعملو لللرابرز، تفتكر ده عشان الرابرز عاوزين شغل نمطي يجيب ڤيوز؟ ولا لسه بتكون أصوات ليك تمشي بروداكشن لرابر؟
- السبب في ده هو إن الرابرز اللي موجودين مش بالنضج الكافي لاستيعاب أي حاجة غير اللي موجود. بيدوروا علي الفيوز أكتر ما بيدوروا علي التطوير في مزيكتهم، فتلاقي كل اللي بيطلع منهم شغل نمطي ومتشابه، فلو عرضت علي أي حد منهم مزيكا فيها تغييرات عن الشكل اللي هو حفظه في دماغه بيعطل خالص، فبتحاول توسطن الأمور.
بحس صوت "المربوعة ٣" ينفع يتسمع في الكلوب علي سماعات كبيرة، بس معرفش لو لعبت في كلوب قبل كده ولا لأ؟ ده التراك المفضل عندي من حاجاتك. ينفع تحكيلنا شوية عنه؟ وعن اختيارك للأصوات فيه؟
- "المربوعة ٣" هو برضه من التراكات المفضلة عندي بسبب التنوع والاختلافات الكتيرة اللي فيه. هو لسا متلعبش في كلوب بس قريب إن شاء الله. في المقطوعة دي حاولت فعلا أوصل للكلوب بشكل ما، من حيث سرعة التيمبو والمزج بين الإيقاع الغربي والشرقي، ومن حيث أصوات ال arps و leads وال synthesis اللي بتكوّن جمل لحنية سريعة، ومابعدتش عن روح جمل السملات لأني بعتبر المربوعة بشكل عام هو استكمال لمشروع السملات.
إيه سبب اختيارك للجماليات aethetics بتاعة الحضارة الفارسية ؟ و اسم شاه؟
- سبب اختياري هو دراستي زي ما قولت إني بدرس في قسم آثار إسلامي ومنها اللغة الفارسية واللغة التركية وحضارتهم، فاتشديت ليهم بشكل كبير واتأثرت بيهم وده من أسباب اختياري لاسم "شاه" الفارسي واللي معناه "ملك" بالعربي.
بداياتك كانت في الهيب هوب؟ ومين أكتر الناس اللي أثرت فيك؟
- بداياتي في دخول مجال الموسيقى قديم جدًا، من وأنا في ابتدائي كنت بغني وبعزف على (الاورج والماندولين والجيتار) وبلعب إيقاعات على الدرامز والدرابوكا والدوف والكاخون، بعدها بدأت العب beatbox فكان وجودي في مجال الهيب هوب بشكل كبير. أما بداياتي في البروداكشن واتجاهي لفكرة إنتاج الموسيقى فكانت مع تسجيلات كفر الدوار. من أكتر الناس اللي أثرت فيا كموسيقي، طبعا يونس ومؤمن سعد، ساعدوني بشكل كبير في فهم حاجات كتير وتوجيهي في بعض الأوقات وبرضو في موسيقيين موجودين بس مجمعناش أي تعامل وهما زولي وموريس لوقا.
مجموعة كفر الدوار ، من الشركات الي ظهرت مؤخرا علي الساحة، ازاي انضمتلهم ؟ و هل في شغل اكتر في المستقبل سوا ؟
- انضمتلهم من البداية لاننا كلنا ف تسجيلات كفر الدوار صحاب وكان في علاقات بينا ف الحياة العادية كلنا قبل ما تظهر تسجيلات كفر الدوار واكيد هيبقي ف شغل علي طول مع تسجيلات كفر الدوار لاني جزء منها وعلي طول هفضل جزء منها مش مجرد شركة بتعاون معاها
هل مركز على الموسيقى بس في حياتك ولا في حاجات جانبية؟ وهل بتأثر علي وقتك كموسيقي لو موجودة؟
- الفترة دي الحقيقة مركز بشكل كبير جدا في الموسيقى وتكاد أن تختفي حياتي الجانبية، لأني معظم الوقت يا بشتغل في حاجة معينة فيها، ولما بنزل مثلا بقعد ع القهوه مع يونس وسليمان وفتحي وإبراهيم إكس ومؤمن والشباب، بتبقى المزيكا جزء من كلامنا دايما، فالموسيقى بالنسبالي موجودة في كل أجزاء يومي.
طبعًا إنك تعيش على الموسيقى بس ده صعب جدًا في مصر لو مفيش Hit أو معندكش معارف وشغل مع ناس بتقدملك مبالغ محترمة. تفتكر عندك حل للمعادلة دي؟ ولو الفلوس قصرت معاك هتعمل إيه؟
- حل المعادلة دي هو إن يبقي موجود أماكن أكتر للحفلات وعشان كده كل الموسيقيين بيلجأوا إنهم يعرضوا شغلهم بره، لأن السوق أكبر بره والفلوس أكتر، وهو حاليا الفلوس أصلا مؤثرة في الحياة العادية في احتياجاتي اليومية، وفي احتياجي لمعدات أحدث لشغلي، بس بحاول على قد ما أقدر أنتج واشتغل واستمر.
كفر الدوار، البحيرة، تفتكر بما إن السوق ضيق هنا في القاهرة أصلا، وجودك بعيد عن العاصمة مضر لشغلك؟
- أكيد طبعًا ده بيأثر عليا بشكل كبير من حيث القدرة على عرض الشغل بتاعي لايف وبرضوا كمردود مادي.
+ في أي أعمال جاية نستناها؟
- هو حاليا الفترة دي تركيزي في إني أظهر مشروع السملات والمربوعة، لأن أنا شايف إنهم ماخدوش حقهم في اللايف وانتشارهم ممكن يتم بشكل أكبر.
تابع شاه على Instagram و Bandcamp
