قفلنا 2018 واحنا عارفين إن الراب العربي وصل لمرحلة قوية جداً، سواء في الإنتاج الموسيقي أو على مستوى الأغاني نفسها، وحتى مستوى الرابرز نفسهم في الفيديوهات والانتشار من أول بلاد المغرب العربي لحد الخليج. في نهاية 2018 عملنا قائمة بأفضل 50 تراك راب عربي، ولصعوبة الاختيار اضطرينا نضحي بتراكات كتير قوية، بس مع بداية السنة الجديدة، عملنا قائمة ممكن تقول عنها "الوجبة الموسيقية الدسمة" من الراب العربي، تبدأ بيها 2019.


سرايا صفرة - ابن حسني

بعد ما نزل الرابر القهراوي "ابن حسني" ال EP بتاعه بعنوان "المزيكا مخدرات" السنة اللي فاتت، رجع السنة دي بتراك "السرايا الصفرا" عشان يبشر الناس إنه الفترة الجاية ناوي يعمل طفرة في مشهد الراب المصري.

مجنون مايهمنيش كلام الناس ولا بهتــم

في الشارع ماشي اغني مسيري اني اعمل طفره

إستني .. في دماغي سرايا صفره


سندباد - مروان بابلو

سنة ريحتها فلوس
ريحتها خمرة ريحتها دروس
جت سليمة و مش محبوس


ينهي مروان بابلو سنة 2018 بكلماته عن مشواره والتغيرات اللي طرأت عليه في 2018، بعد ما غير اسمه من داما لبابلو ويبدأ مشوار جديد في سنة جديدة وصوت جديد ومزج بين ال R&B والتراب في إنتاج موسيقي خيالي.


عادي - الوس ومسلّم هديب وسايكدليك

أصدر الرابر الفلسطيني إيلي قواس المعروف باسم "الوس" تراكه الجديد بعنوان "عادي" من ال EP القادم له، بالاشتراك مع الرابر الأردني مسلّم هديب والرابر الفلسطيني سايكدليك. التراك من إنتاج الموزع الفلسطيني MrBananaPeel. التراك لتشويق المستمع عن شكل ولون ال EP اللي هيكون بعنوان "من جوا" اللي المفروض ينزل في 2019.


حقل المعارك - دوستا

دخول مفاجئ من جنوب مصر "الصعايدة مملكة". أصدر الرابر المصري من الصعيد مصطفى جمال المعروف باسم "دوستا"، تراكه الأول في بداية السنة باسم حقل المعارك. التراك هو رسالة منه لمشهد الراب المصري إن صعيد مصر موجود وجاي بقوة رغم التهميش.


اتش ال جي - سمُل أكّس من فريق شايفيين

بعد انقطاع عن المشهد المغربي أكتر من 9 شهور تقريباً، رجع بقوة الرابر المغربي Small X من فريق "شايفين"، بفيديو جديد بعنوان "اتش ال جي" من إنتاج موسيقي للموزع سُفيان، اللي أنتج آخر أعمال المغنية المغربية منال مع الرابر الجراند توتو. الغريب إن بعد انقطاع فريق "شايفين" عن إصدار أي تراكات جديدة من حوالي 9 شهور، يرجع بس واحد من الفريق بتراك منفرد، ده يخلينا نسأل: هل فريق "شايفين" تفكك؟


بلالين - باسم وال خمسة

أول تجربة غنائية وظهور فني للمغني باسم علي، صاحب ستوديو "إمباير" في الإسكندرية ومن إنتاج الموزع الإسكندراني صبري، المعروف باسم "ال خمسة". التراك هو R&B من كلمات باسم وصبري، تعتبر تجربة ناجحة ومبشرة على نوعية الأغاني دي اللي تندرج تحت الموجة الجديدة في مشهد الراب المصري.

صفر - شيبوبة

من السعودية وبعد سنة تقريباً، ينزل الرابر السعودي "شيبوبة" بفيديو كليب جديد عنوانه "صفر"، بالاشتراك مع الرابر Daddy KooL ومن إخراج Boogie Down. بيقول "شيبوبة" بكلماته رأيه عن شخصيات الرابرز في مشهد الراب العربي.


تبى تعرف رابر على حقيقته شوفه قبل ما يشتهر


23 - الفلس

رجع الرابر السعودي "الفلس" بشكل جديد ولون جديد في تراك اسمه "23"، بيعالج فيه مواقف اجتماعية من وجهة نظره الخاصة في تركيب لغوي حاد، على إيقاع اولد سكول وأسلوب غير مرن ولكن واضح وجدي، فكرني بتراكات الرابر الأمريكي راكيم.


تباً للجميع ريمكس - نادر ان دي وسام

بعد "تبًا للجميع" الجزء الأول و "تباً للجميع" الجزء التاني بالاشتراك مع الرابر "سام" ومن إنتاج "نادر"،  قرر نادر يعمل ريمكس لأغنية من إنتاج الموزع القهراوي YooriHab، الريمكس خلق حالة موسيقية جديدة للأغنية أفضل من النسخة الأصلية بسبب اللحن الموسيقي اللي فكرني بنفس فكرة موسيقى "نايت رايدر" للموسيقي العبقري Stu Phillips.


اوكي - جوني مكعبل وسلامة وعتمى

مشهد الراب الفلسطيني ينتفض في تراك جديد من إنتاج جوني مكعبل وبالاشتراك مع الرابر "عتمى" و"سلامة" من حيفا. المزاج الموسيقي اللي خلقه التراك معبر ومبشر عن قوة المشهد الفلسطيني والتطور اللي بقى فيه.


بيان رقم 1 - أيلول الأسود

تراك "بيان رقم واحد" هو أول تراك لمجموعة "أيلول الأسود" من بلاد الشام ومن إنتاج الموزع "وردِنْكلِفّ" من بلاد الشام. المجموعة مكونة من رابرز من بلاد الشام، هم الرابر السلام ناصر وابن حواري وشائك وإياد.


رعاية - دوشة ونووب

رجع الثنائي من القاهرة، الرابر "دوشة" والرابر "نووب" في تراك مختلف ومعاصر للون التراب المصري الجديد اللي هي "الموجة الجديدة"، التراك مبشر جداً عن اللون اللي تقريباً "نووب" ممكن يختاره لنفسه في ألبومه الجديد اللي المفروض إنه بيشتغل عليه السنة دي. كمان "دوشة" قدر يرجع لنفس المستوى اللي كان عليه زمان بعد ما افتقدناه الفترة الأخيرة دي.

لا أبالي الجزء التاني - نيون وعمر جي إكس

بعد نجاح "لا أبالي" الجزء الأول للرابر "نيون" بالاشتراك مع "عمر جي اكس"، قرر الثنائي إنهم يعملوا "لا أبالي" الجزء التاني. الإنتاج الموسيقي للموزع "نيون" والممتع في الموضوع إن الجزء الأول "عمر جي أكس" كان مسيطر على التراك، لكن الجزء التاني "نيون" هو اللي خطف التراك من عمر بسهولة.


راحت - السينابتيك ومحمود جريري

اشتراك جديد "للسينابتيك" بس المرة دي مع الجيل القديم المتمثل في محمود جريري من فريق "دام" ومن أهم فرق الراب المؤسسة للمشهد الفلسطيني على موسيقى من إنتاج الموزع الفلسطيني جريس بابيش


إفري داي - ليلو الباشا

أول أعمال "ليل اتشي" هو فيديو كليب بعنوان everyday من إنتاج SOS وإخراج علاء الدين وSOS. "ليل اتشي" ثنائي دائم يعني كل الفيديوهات من إنتاج وإخراج علاء الدين، والمرة دي واضح إن "ليل اتشي" هيغير اسمه ويكون "ليلو الباشا" عشان ده اللي بان من cover الصورة على الانستجرام. الفيديو فيه مؤثرات بصرية كتير وتلوين مختلف عن أي حاجة عملها قبل كده علاء مع الرابر "اتشي" قبل كده.