يعني إيه "رابكة"؟ "رابكة" هي سلسلة حلقات عن الهيب هوب المصري، بتكشف الستار عن الجيل الموجود في مشهد موسيقي مش ناس كتير تعرف عنه. يعني بيعملوا إيه والمزيكا دي عاملة ازاي؟ وعن التطور اللي حصل في الراب المصري بمدرسته الجديدة. كل ده أكيد من غير ما نتجاهل تاريخ الراب ولا نقلل من شأن الأجيال اللي قبل كده، اللي لازم هيكون ليها نصيب من الحلقات، عشان من خلالهم هنعرف أكتر عن الراب المصري.


أول حلقة من "رابكة" عن الرابر مروان بابلو من الإسكندرية، اللي قدر يطور في "التراب ميوزيك"، وكان له تأثير واضح على جيله والجيل الجديد من الرابرز والموزعين.


الراب زيه زي أي حاجة في الدنيا، له رواد وناس بدأته ولولاهم ماكنتش هتسمع عن المزيكا دي في مصر. لو أنت قديم فأكيد تعرف جيل المؤسسين، لو ماتعرفوش ارجع لسنة 1998، وتحديدًا فريق "واي كرو" اللي أسسها "عمر بوفلوت" واستمرت لحد أواخر سنة 2004. من بعدها ظهر رابرز تانيين، زي فريق "ايجي راب سكول" من الإسكندرية سنة 2005،  و"الواى فاميلي" و "ام سي أمين" و "الهيذام" من المنصورة.. إلخ.


من القاهرة كان في ناس زي "اربيان نايتس" و "مستر كوردي" و "روميل بي" و فريق " اسفلت"وغيرهم من أجيال طورت وساعدت في بناء مشهد الراب المصري، من أول رابرز وموزعين لحد ناس مهتمة بتصوير فيديوهات، وصولاً للجيل الحالي اللي قدر يعمل "ربكة" في مشهد الموسيقى المصري ويخلق الصوت اللي الودن المصرية تسمعه وتبلعه.


ومن هنا تقدر تشوف حلقة رابكة مع مع ويجز