في الحلقة الثانية من سلسلة SceneNoise اللي بتوثق أبطال الموجة الجديدة من موسيقى الراب في مصر، هنتكلم عن الرابر السكندري "ويجز"
ابن حي "الورديان" اتقلبت حياته تمامًا بعد نجاح أغنيته "تي إن تي" اللي نزلها كفيديو كليب على يوتيوب في بداية 2018، والكليب ده كان واحد من الأسباب اللي مهدت لتطور موسيقى التراب المصرية، قبل ما يتعاون مع نجم المهرجانات السادات، في أغنية "خربان". "خربان" حققت حوالي 10 مليون مشاهدة على يوتيوب، ولمّحت بشكل قوي إن مستقبل الموسيقى في مصر، ممكن يكون في التعاون والتقارب بين موسيقى الهيب هوب والشعبي، وده اللي هنكتشفه أكتر في الحلقة التالتة من #رابكة.
ويجز حاليًا بينزل تراكات جديدة بشكل مستمر، عشان يحافظ على وجوده في المشهد ومستواه، ويظهر للجمهور قدراته كرابر على استخدام قوافي مختلفة وألحان مميزة، وجاهز لأي تعاون مع أي حد في أي وقت. أكيد ده هيخلي مسيرته الفنية تتطور وصوته يوصل لناس أكتر، عشان هو بطبيعته بيعرف يعمل #رابكة.
