أواخر 2012. المدينة الجامعية مش مكان فيه تسالي كتير، أكتر وقت مسلي بيكون في التجمعات. 20 ولا 30 واحد ممكن يقعدوا في أوضة ماتزيدش مساحتها عن 2 متر، يلعبوا فيفا أو يسمعوا مزيكا. في واحدة من التجمعات دي، سمعت "البوكسر" لأول مرة. كلام مختلف وغريب، مافيش مزيكا ولا Beat، الصوت والكلمات هما اللي بيغنوا. مين دول؟ جاوبني صاحب البلاي ليست: "دول شارموفرز". من وقتها ارتبط معايا "شارموفرز" بفترة المدينة الجامعية، وبإنهم كانوا اكتشاف من اكتشافات كتير حصلتلي في المكان ده، ومصدر مزيكا مختلفة وتسلية في مكان مايعرفش التسالي.
أي أغنية ممكن تكون مرتبطة معاك بذكريات أو
بمكان أو بقصة، بس تفتكر إيه قصتها الأصلية؟ الناس اللي كتبوا كلماتها وغنوها
وقدموها للناس في سيديهات وعلى السوشيال ميديا، ولعبوها لايف في حفلة قدام كام ألف
واحد، الأغنية مرتبطة معاهم بإيه وبتفكرهم بإيه؟ "شارموفرز" مش بيقدموا
حاجة تقليدية، وده سبب أدعى إن عدد مش قليل من تراكاتهم يكون له قصة وحكاية.
شارموفر العظيم استقبلنا في الستديو بتاعه وجابلنا الزيتونة.
"البوكسر" مش أول أغانينا أصلًا:
تعرف إيه عن A Chat In
The Garden؟
أول أغنية نلعبها كانت إنجلش، اسمها A Chat In The Garden.
نص الأغنية كانت عن بنت مصاحبها "مو" ونصها التاني عن صاحبة "بهاء"
اللي كانت هتهاجر على دبي. ده السبب أصلًا اللي خلانا نعمل البيدج من 6 سنين، كنا
عاوزين ننزل أغنية ومش عاوزين ننزلها قرعة كده، قومنا عملنا بيدج، البيدج كان فيها
7 أصحابنا، لما بقوا 30 كان حدث، بعد كده لما "البوكسر" نزلت بقينا
معروفين وعندنا بتاع 5 آلاف فانز كده.
2- كوكتيل الشهرة: كيمو كونو + ميكس فراولة
وشيكولاتة
عملنا "البوكسر" بقى. كانت بداية
التراكات اللي مافيهاش beat
ولا مزيكا، غنا بالكلام بس والأصوات. بيحكيلنا بهاء: "كنا قاعدين سوا بنهزر
فقولت لمو وهروح على ماك مش هطلب بيج ماك، قالي سجلها بسرعة. الحاجات كانت
بتطلع بالتلقائية دي، وكملت باقي كلام الأغنية وأنا بسجلها أصلًا".
"خلصنا أول مقطع من الأغنية ونزلنا على
الكشك، مو جاب كيمو كونو وأنا جيبت ميكس فراولة وشيكولاتة. أول ما خلصنا التراك
نزلناه على طول، وكانت كواليتي مافيش خالص، وكانت أول مرة تطلع اللغة بتاعت شارموفرز
اللي هي الإيزي ماما دي. نزلت الأغنية ولاقينا فيدباك قوي من الناس، كانت يوتيوب
وفيسبوك، وبعد كده نزلت تاني بكواليتي أنضف في ألبوم "بارانويا".
3- Sinai:
هنصورها في "طشت مياه"
بيقولنا "مو": "في الفترة دي
كان بوب بيطلع سينا كتير وأنا ماكنتش بخرج من أوضتي خالص، بوب بينزل يعيش ويروح
وييجي وبتاع بعدين يرجعلي بالتجارب والخبرات دي يلاقيني في الأوضة، نقوم عاملين
الغنوة. دي كنا عاوزين نصورها في طشت وزعانف عشان أنا ماكنتش بخرج، كانت هتطلع
وحشة فشخ. قدر ولطف!"
4- ما في كلام: يا عم أنا مش بكتب أغاني
أصلًأ!
بيحكيلنا "بوب": "أنا كبوب أصلا
مش كاتب أغاني وماكنتش عارف أكتب، فطلعت الأغنية عشان كده. ما في كلام ما في كلام
طب وهو في أغنية من غير كلام؟ دي أغنية مالهاش أي هدف في الحياة بس نزلت عشان كنا
عاوزين ننزل حاجة".
5- شرموفيت: أكتر حاجة بنحبها
بيقول "مو": "شرموفيت كانت بداية التويست وكانت أول مرة نكتب حاجات حقيقية بتحصل، فيمكن عشان كده هي أقرب أغنية لقلبنا. هي مزيكتها سيمپل جدا، بس أول مرة نطلع حاجة شخصية للناس والناس تحبها وتغنيها. بيضيف "بهاء": "أنا كمان عملت فرحي زي الفرح اللي كان في أغنية شرموفيت، كان فرح جامد".
6- شامبيون: إيه اللي احنا بنغنيه ده؟!
دي بالنسبالنا كانت أغنية "بيئة"
مش عاوزين ننزلها، بس نزلناها عشان ناس أصحابنا كانوا شايفينها جامدة، والناس
حبيتها. بس احنا كنا عاوزين نرميها أصلا، إيه اللي بيقول "يلعب بايسبس
وترايسبس وهيبقى سكس ويغيظ الإكس"؟! بس طلعت حلوة.
7- السيرك: المدرسة الواقعية في الحياة
الجامعية
دي برضه الأغاني اللي بتتكلم عن حاجات
حقيقية. عملناها نتكلم فيها عن الجامعة وأول يوم في الجامعة، كل الناس داخلة
سخنانة، عاوزين يكونوا أصحاب بسرعة أوي فيبقوا اجتماعيين بزيادة، بعدين بعد شهرين
تلاقيه لوحده خالص. في "البورم" وفي اللي مش فاهم حاجة خالص واللي "بزبيبة"
وبدقن والمثقفين أو المثقفين شكلًا أو اللي ساقط بقاله 10 سنين في الجامعة عشان
شايف إن الناس مش فاهمينه.. إلخ. السيرك هي كل ده.
8- إيزي ماني: إيه اللي بتكتبه ده يا أحمد!
بيحكيلنا "بهاء" قصتها: "كنت
بألفها في العربية وأنا مع أبويا وأمي، وبقول خد تعالى في الدرا اديك مادة مخدرة،
فماما تزعق وتقولي إيه يا أحمد اللي بتكتبه ده؟ بابا يقولها مالكيش دعوة سيبيه لما
يخلص الأول، حطيت السماعات وسيبتهم يتخانقوا وكل شوية لما أشيل السماعات ألاقي
موضوع الخناقة اتغير، لغاية ما خلصت الأغنية أو جزء كبير منها وأنا في العربية".
9- البرطمان: عقاب المتحرش بدون معلم
أغنية عاملناها عن واقعة تحرش ببنت في وسط
البلد. عملناها في ساعتها، كنا غضبانين فشخ ومتضايقين من اللي بيحصل. كان الملخص
بتاعها إن أي حد هيتحرش هنقطع عضوه ونحطه في برطمان، ونكتب على البرطمان اسم الشخص
وقصته، ويبقى عندنا متحف برطمانات كبير وبيوثق وقائع التحرش والعقاب بتاع
المتحرشين. كانت أغنية أجريسيف جدًا وروك باين فيها الغضب بتاعنا.
10-
كوكونت: بيكلمني في شهر العسل ليه ده؟!
بيفتكر معانا "مو": بهاء اتجوز
وراح شهر العسل، تالت يوم في الهاني مون بتاعه الاقيه بيكلمني! عاوز إيه ده؟ بقول
ألو لاقيته بيقولي: كوكونت كوكونت نطت في البسين الشمس عملت بقعة حمرا على كتفي
اليمين". بيشرح "بهاء": كنت قاعد على البسين وفي نخلة فوقي وعليها
واحدة كوكونت، هوب جات الفكرة. السفر عمومًا بيفيد ودايمًا كل سفرية سافرتها كان
بيطلع منها حاجة".
11- مفتقد الحبيبة: سنة ونص على ما كلمات
الأغنية خلصت!
أول مرة "شارموفرز" يعملوا أغنية
كده، أكيد ليها قصة، بيحكيلنا بهاء: "مو كان عامل أول حتة من المزيكا بتاعت
الأغنية، بداية الموضوع أصلًا كانت من عنده، كان هو كل شوية يصاحب واحدة ويسيبها،
فأول حتة في الأغنية اتكتبت عليه، بعدها بسنة ونص كملت المقطع ده وقلبت الموضوع
على الحبيبة بتاعتي أنا وكملنا الأغنية. الموضوع أخد الوقت ده لأن الكلمات دي مش
سكتنا خالص ولازم نبقى فاهمين الموضوع".
12- انفصام: المرض النفسي مابيضحكش
الألبوم الأول كان اسمه
"بارانويا"، وبعد طول انتظار قربنا نشوف الألبوم التاني باسم
"انفصام". كل أغنية ليها حكاية، بس الحكاية المرة دي مابتضحكش، لكن
بتناقش حاجة مهمة ومش واخدة حقها رغم أهميتها. بيقولنا "بهاء": "المرض
النفسي حاجة مهم جدا التعامل معاها والاعتراف بيها. السينما والميديا كانت بتوضح
ده بطريقة غلط وبطريقة كوميدية، ورسخت في العقول إن مستشفى المجانين ده مكان
كوميدي للمجانين بس الموضوع أكبر من كده بكتير. في العصر اللي احنا فيه المرض
النفسي موجود بقوة بسبب ضغوطات الحياة والمشاكل العامة، كمان الاختلافات بين
الأجيال عاملة مشاكل نفسية كتير عند الأجيال الجديدة في العالم كله، عشان كده
عملنا انفصام".
كل قصة من دول وراها آلاف القصص من ناس
تانية، فلان أول مرة سمع الأغنية وضحك، أو الأغنية اللي اتشغلت في فرح فلان صاحبنا
وقعدنا نرقص عليها، وفلانة اللي صاحبتها بعتتلها الأغنية وهي بتذاكر وقالتلها
اسمعي دي. الأغنية بعد وقت بتكون ملك كل واحد سمعها زي ما هي ملك أصحابها، كل واحد
بيحطها في رواية خاصة بيه. أنهي أغنية لشارموفرز معلقة معاك بحاجة مش هتنساها؟
اسمع ألبوم "انفصام" لايف في حفلة "شارموفرز يوم 8 مارس الجاي. تفاصيل أكتر هنا:
https://www.facebook.com/events/2201518496578127/
