الأغنية مش بس مغني وملحن وعازف، في برضه مؤلف الكلمات، ودور مؤلف الكلمات لا يقل أهمية عن العازف والملحن والمغني، عشان كده الاهتمام بالناس، اللي بنقول عليها خلف الكواليس، أمر ضروري، والناس دي مش عليها العين رغم أهميتهم في نجاح الأغنية، زي ما حصل في ألبوم "مسار إجباري" الجديد "الألبوم"، تحديدًا أغنية "نهايات الحكاوي" تأليف "أمار مصطفى" واللي كتبت أكتر من أغنية ناجحة للباند زي "اقرا الخبر" وأغنية "موسم صيد الغزلان" المستوحاة من رواية أحمد مراد بنفس الاسم. كان لازم نتكلم مع أمار مصطفى عشان نقرب أكتر و نفهم مين هي أمار اللي كتبت أغاني ناجحة في وسط الفرق المستقلة ومشهد الموسيقى البديلة.
إيه اللي دخلك في الكتابة يعني أول ما بدأتي كنتي بتكتبي شعر ولا قصص؟
كنت بكتب شعر، وأول مرة كانت أغنية رثاء لخالي الله يرحمه وأنا في ثانوي، كنت كأني بفكر في الكلام وأنا نايمة بين الحلم والحقيقة وصحيت وولعت النور وكتبت اللي كان بيتردد في دماغي، أغنية مستوحاة من جواب خالي كتبه لأمي.
طب ازاي دخلتي مجال كتابة الأغاني والموسيقيين عرفوكي؟
أصدقائي من زمان كانوا مهتمين بالفن وعارفين إني بكتب، فلما كان بيكون فيه حد بيدور على كلام أو بيأسس باند كان اسمي يترشح قدام اللي بيدور، كمان صحابي في الكلية ومن قصور الثقافة اللي كانوا مهتمين بالموسيقى، كنا بنعرف نلاقي بعض.
ليه اللي بيكتب الأغاني بيقولوا عليه شاعر ولا الموضوع بيتحسب ازاي؟
الحقيقة أنا عمري ما قولت على نفسي الشاعرة، الناس هي اللي ليها الحكم، عن نفسي أنا بقول بحب اكتب والسبب إن ده شئ ممتع ليا وبيفرحني، حتى صفحتي اسمها آمار مصطفى، ولا الشاعرة ولا الفنانه ولا الكلام ده، آمار مصطفى بس والناس تشوفني زي ما هي عايزة.
أغنية نهايات الحكاوي دي ليكي ولا لمسار اجباري؟ يعني كنت بتتكلمي عن نفسك ولا حاجة عامة؟
كل حاجة بكتبها بيكون فيها تجربة شخصية ليا، سواء كلها أو مش كلها، وأحيانًا بتكون workshop بيني وبين زمايلي الموسيقيين على فكرة معينة لمستنا كلنا، بس إذا ماكانتش الفكرة لمساني أنا مش هكتبها. "نهايات الحكاوي" هي نابعة من إحساسي وتجربة شخصية ليا وحبيت أوجه بيها رسالة أنا شايفة إنها حقيقية، وهي إن نهايات الحكاوي ما هي إلا بدايات لحكاوي تانية أو لحكايات تانية وكل طريق بيخلص هو بداية لطريق تاني.
اما بتكتبي بتفكري إن الكلام ده يلمس كل الناس ويعبر عنهم ولا مش شرط؟
أنا مش دايمًا بفكر عشان أكتب، أحيانًا بحس إن الكلام بيطلع لوحده ولو مافيش إحساس مافيش حاجة هتطلع، لازم ابقى حاسة الموضوع، فاهمني؟ طبعًا بتمنى كلامي يلمس كل الناس ومش فئة معينة من الناس ويسيب فئة تانية، بس لو ده ماحصلش وأنا حسيت إن في فكرة معينة أو إحساس معين بيلح عليا وعايزة أطلع كلام جوايا، ده بيبقى شئ مختلف، بتفضل الفكرة تلح عليا والإحساس يفضل يلح عليا لحد ما الكلام يطلع مني على الورق.
إيه رأيك في المهرجانات والراب؟ في الأسلوب الكتابي يعني؟
أنا الراب شايفاه فن وبحب أغاني كتير جدًا راب وبحبها جدًا، زي ما أنا شايفه الشرقي فن وشايفة الروك فن بيحترم كل الأذواق. في الأسلوب الكتابي الراب فيه معاني قوية جدًا، يعني في أغاني راب لبنات بتكافح بيها التحرش ومفاهيم غلط وفي أغاني راب بتناهض العنصرية. بحب أحمد مكي جدًا على فكرة.
طب والمهرجانات؟
والله المهرجانات ماقدرش أديك رأي فيها، ما سمعتش إلا يمكن بالصدفة وأنا ماشية في الشارع وده مش كافي، ما بقعدش اسمع أغنية كاملة ولو كنت في فرح أو حاجة وسمعت حتة صغيرة، ساعتها ببقى مشغولة الهيصة ومش مركزة في الكلام.
أنت كلية إيه؟
كنت في الأكاديمية العربية للعلوم والتكنولوجيا قسم هندسة كمبيوتر
مرحلة الكلية كانت مهمة بالنسبة لمشوارك؟
هل جالك يوم قولتي فيه أنا هبطل اكتب؟
لأ ماجاش يوم قلت هبطل اكتب وماقدرش اعمل كده، لأن دي حاجة مش أنا اللي بتعمد اعملها، يعني أحيانًا بتعمد اكتب وأحيانًا الموضوع بيكون غصب عني، شبه النفس كده، يعني ما ينفعش تقرر تبطل تتنفس أو تبطل تاكل وتشرب.
رفضتي تكتبي لحد قبل كده؟
اه رفضت أكتب لناس قبل كده وبرفض أكتب لأي حد أحس لحظة إنه ممكن يقلل مني أو يطلع شغلي في صورة ما تليقش أو ما يوفنيش حقوقي الملكية والفكرية كاملة.
أنت اللي بتحطي السعر ولا الموضوع ماشي ازاي؟
غالبا أنا اللي بحط السعر، يعني لو حد يعرفني كويس وبنتعامل من زمان أوى بيسألني السعر ده كويس ولا لأ وأنا بحدد.
هل أنت معتمدة على كتابة الأغاني كدخل ثابت؟
لا مش معتمدة عليها كدخل ثابت وإن كان بيجيلي منها دخل كويس طبعًا لكن أنا بشتغل برضه.
بتسمعي مين في المزيكا ومين مثلك الأعلى في الشعر أو الناس اللي بتكتب الأغاني؟
أنا بحب شعراء كتير جدًا ومثلي الأعلى فؤاد حداد وصلاح جاهين، اما في الناس اللي بتكتب جديد، في كوثر مصطفى وأيمن بهجت قمر، ومن الجيل الشباب بتاعي بحب دعاء عبد الوهاب وحازم وافي ومحمد السيد وأحمد شبكة وممدوح فوزي وغيرهم كتير.
إيه الأعمال الجديدة اللي لسه ما نزلتش ليكي ونازلة في السكة وفي حد من الفنانين الكبار هتشتغلي معاهم؟
بص أنا شايفة أصلا إن أنا شغالة مع فنانين كبار زي "مسار إجباري" و "وسط البلد"، أما على الساحة الفنية أنا كان ليا قبل كده أغنية في فيلم "ميكروفون" بطولة خالد أبو النجا وعملت أغنية عن كتاب أحمد مراد "موسم صيد الغزلان"، يعني شغالة مع فنانين كبار، وبالنسبة للجديد في شغل بيجهز الفترة الجاية وفي حاجات اتعملت ولسه ما نزلتش، بس المفروض إني ماحرقش واتكلم فيها قبل ما تنزل.
صورة الغلاف تصوير"احمد سعد"
