أوديسّي.. أول ألبوم لـ ياد عود اللي بيجمع فيه بين الشرقي والفيوچن
الفنان البحريني الموهوب ياد عود نزل أول ألبوم ليه بعنوان "أوديسّي"، بعد شهور من الشغل والبحث عشان يطلع حاجة مختلفة تجمع بين روح العود الشرقي والستايل العصري.
فنان العود البحريني ياد عود أطلق أول ألبوم في مشواره بعنوان "أوديسّي"، واتعمله حفلة استماع قبل إصداره بشكل رسمي على كل المنصات الموسيقية، والحضور وصفوا الحفلة إنها كانت خيالية.
ياد عود معروف إنه بيعيد تقديم الكلاسيكيات العربية بطريقة جديدة، وقدر يوصل موسيقته لمستمعين كتير على المنصات الموسيقية المختلفة.
ياد كتب على إنستجرام إنه بدأ يشتغل على الألبوم من فبراير، وكان فاكر الموضوع هيبقى بسيط، شوية مقاطع صغيرة ويخلص. بس مع الوقت، المشروع كبر وبقى ألبوم كامل بيعبر عن شخصيته الموسيقية ورؤيته وقدر ينزله بشكل رسمي في أغسطس 2025 على كل المنصات الموسيقية.
أوديسّي
الحالة الموسيقية اللي بيقدمها "ياد" في ألبومه "أوديسّي" مختلفة تمامًا عن الثقافة البحرينية، المعروف عنها أصالة آلة العود، لكن اللي حصل في "أوديسّي" كان مزج العود بالـ"فيوجن فانك". حالة موسيقية جديدة ومتقنة بشكل كبير ومقبولة للسماع من جمهور الآلة رقم 1 عنده هي العود.
ليلة مميزة للألبوم في البحرين
قبل ما الألبوم ينزل رسمي، تحديدًا يوم 14 أغسطس 2025، اتعمل حدث خاص للاستماع للألبوم في المسرح الوطني البحريني، في تجربة خاصة ويبقى ليهم الحق يقولوا رأيهم في الألبوم بشكل مباشر.
اللي حضروا الحفلة وصفوها إنها كانت خيالية ومليانة أجواء ممتعة، وكلها موسيقى وتفاعل قوي من الجمهور، وقالوا إنها كانت تجربة مميزة.
مين ياد عود؟
واحد من أبرز العازفين البحرينيين على آلة العود. مشهور إنه بيعيد تقديم الكلاسيكيات العربية بطريقة جديدة فيها روح المزيكا العالمية. على يوتيوب و سبوتيفاي عنده جمهور كبير، وبيوصّل موسيقته لملايين المستمعين حوالين العالم.
من التجارب للألبوم:
خلال الفترة اللي فاتت نزل شوية تراكات مترجمة ومعاد صياغتها بالعود، زي:
All The Stars (Arabic Version)
NUNCA MUDA? (Arabic Version)
Chamber Of Reflection (Arabic Version)
الحاجات دي كانت مجرد مقدمة للرحلة الكبيرة اللي ظهرت في "أوديسّي”، واللي خلته قادر على الخطوة دي.
الألبوم مش مجرد تجميعة تراكات، لكنه فعلاً رحلة موسيقية بين التراث العربي والأصوات الحديثة. “أوديسّي” خطوة كبيرة في مشوار “ياد” وأكيد هيفتحله أبواب أكبر قدام جمهور المزيكا في المنطقة والعالم.
