ويجز ومروان موسى هيصدروا ألبوماتهم الجديدة يوم 29 أغسطس

بعد ما ألبوم "جدول الضرب" لويجز نزل على كل المنصات الموسيقية في شهر فبراير 2025، وكان مكون من 7 تراكات، نزل ألبوم "الرجل الذي فقد قلبه" لمروان موسى في شهر مايو 2025، وكان مكون من 23 تراك متنوعين، وشهد 5 تعاونات مع ليجي-سي وعفروتو والوايلي وكريم أسامة ودنيا وائل وحليم تاچ السر.

دلوقتي النجمين أعلنوا عن ميعاد ألبومهم التاني في 2025. البداية كانت مع ويجز اللي أعلن إن أول تراك من ألبومه هيكون متاح يوم 19 أغسطس، وباقي الألبوم هينزل يوم 29 من نفس الشهر. وقال ويجز إنه هيقدم مجموعة من أغاني الألبوم الجديد في حفلته الجاية في مهرجان العلمين، يوم 22 أغسطس.

وبعد يوم تقريبًا من إعلان ويجز، فاجئ مروان موسى جمهوره بخبر  إن في ألبوم جديد هيسمعوه يوم 29 أغسطس. عشان نكون كده لأول مرة تقريبًا نشوف ألبومين في نفس اليوم لنجمين من مشهد الراب! تفتكروا البيف هيتنقل للألبومات؟ وتوقعاتكم إيه لكل ألبوم فيهم؟