عندي كام سؤال في دماغي بقالي فترة بفكر فيهم: ليه في المهرجان الإسكندراني فيه أسماء ناس بتتقال ومحلات وناس في السوق، ومغني المهرجان يقعد يمسي عليهم؟ إيه الفرق بين مهرجان "سافل" ومهرجان "حكاوي"؟ وإيه الفرق بين مهرجان القاهرة ومهرجان إسكندرية؟ هو مغني المهرجان  ناجح لوحده ولا في فريق عمل وراه؟ يعني مهرجان حمو بيكا الأخير "رب الكون ميزنا بميزة" هو مش حمو بيكا بس اللي سبب في نجاح المهرجان، هو اه جزء كبير بس في ناس تانية من غيرها المهرجان يسقط، فقررت اتكلم مع الكلامنس "إسلام المصري" اللي كتب المهرجان ده وغيره من مهرجانات كتير ناجحة، زي مهرجان "بنعلن الاحتلال" بتاع تيتو وبندق وكمان مهرجان قناصات الرمل (أمك صاحبتي).

بدأت ازاي تكتب مهرجانات؟

بدأت في 2012 في فرقة ستوديو مزيكا مع ميسو ميسرة وحمو التانجو وأحمد الصورص، عملنا مهرجانات زي مهرجان "الرزلين" ، "السافلين"، "الجاحدين" وعملنا كذا حاجة وسمّعنا في البلد.

أنت كنت بتغني مهرجانات الأول ولا كنت بتكتب؟

كنت بكتب شعر وأنا صغير في الابتدائي قبل المهرجانات، لما ظهرت المهرجانات كان في فيلو وحودة ناصر وزيزو النوبي والدخلاوية وتيتو وبندق، كل واحد له فرقة، كان حمو بيكا لسه طالع ساعتها.

دخلت ازاي موضوع كتابة المهرجانات؟

سمعت المهرجانات وجت معايا سكة وأنا اصلا كنت بغني من قبل المهرجانات وبكتب شعبي وشعر، بس المهرجانات علمتني أفتح مخي شوية في الكلام، وبدأت أفهم الدنيا ماشية ازاي، دلوقتي لو جيت أكتب أغنية هعرف أكتب إيه.

 مغني المهرجان بيقولك أنا عايز أغنية عن حاجة حزينة فتقول له أنا عندي واحدة ولا بتمشي ازاي؟

ممكن أكون محضر موضوع وأنا قاعد فاضي مع نفسي ولو حد قالي عايز موضوع بقترح عليه، عجبه بياخده ولو ماعجبوش ببدأ أكتب موضوع تاني، بياخد مني كتابة تلت ساعة كده أو نص ساعة. اه احنا شغالين أوردرات، معظم الإسكندرانية شغالين أوردرات بفلوس، هو أكل عيشنا بنسترزق منه.

بتكتب الأغنية بكام؟

الأغنية بتبدأ من 500 ل 700، ممكن زبون ماعهوش غير قد كده، وكمان حسب اللي أنا أطلبه وأحدده. أنا فلوسي بتزيد أو تقل حسب الفريق اللي بشتغل معاه بيشتغل المهرجان بكام، في فرقة بتشتغل ب4000 جنيه وفي أكتر وفي أقل، والفلوس دي بتتوزع على اللي بيغنوا واللي بيوزع واللي بيكتب، ففلوسي بتتحدد حسب الفريق واخد كام.

يعني المهرجانات اللي بنسمعها دي كلها بفلوس؟

اه كلها بفلوس

آخر مهرجان كتبته هو "رب الكون ميزنا بميزة" في المهرجان ده انتوا بتمسوا على ناس من القاهرة  ليه؟

أه ده إسلام سنوفة من الجيزة هو اللى عامل المهرجان، بيمسى بيه على عمار الشبح، عشان فرحة العريس، يعني ده مهرجان شغل

مفيش حاجة بالحب ؟

بالحب ده لو أنا مثلا معايا فكرة هعملها من غير أسامي، يعني معظم المهرجانات تلاقي فرحة كذا ومنطقة كذا، لكن لو مهرجان أنا عايز أعمله من غير فلوس لنفسي أنا والفرقة، بنعمله من غير اسم حد، يعني اسم الفرقة بس من غير منطقة. آخر مهرجان عملناه بالحب، كان مهرجان "الصحاب هنا"، ده بتاع واحد صاحبي اسمه حمو البحيري.

يعني معنى كده إن دي شغلتك خلاص؟ طب أنت بتدرس إيه؟

أنا في كلية تجارة، لو ربنا كرمني هشتغل في شركة كويسة الصبح، وبليل في موهبتي وكده كده أنا في مجال التمثيل وممثل مسرحي وبعرف أغني عادي مش مهرجانات بس، وكمان بكتب أغاني.

يعني أنت تقدر تكتب أغنية مثلا لتامر حسني وتكتب مهرجان؟

اه ممكن عادي. الشعبي بيعتمد على الكلمات والوجع، زي "صاحبي خاني والناس باعوني"، اللي هو كلام الحزن، اما أغاني الناس التانية بتعتمد على حالة حلوة، زي عمرو  وتامر، بتعتمد على حبيبي وفرحة وأمل وكده.

طب أنت متأثر بحد في المزيكا الشعبي؟

طبعاً أحمد شيبة، رمضان البرنس، حسن الأسمر وعبد الباسط حمودة، أنا بستفيد منهم عشان الناس اللي بتكتبلهم ناس عظيمة وناس كبيرة، وأكيد الناس الكبيرة دي بتفهم أكتر مني وعاشت حاجات أنا ماعشتهاش، فبيكتبوا كلام أنا لسه ماوصلتلوش.

بعد ما تخلص كتابة المهرجان ممكن صاحبه يعدل ويقولك الحتة دي مش عجباني؟

اه ممكن يعدل، بس هو مش بيعيب في الكلام وأنا مش بزعل منه، بس هو بيقولي طب لو الكلمة دي عندنا في أصحابنا مش بنحبها أو الكلمة دي أنا مش حاببها ممكن تبدلها، فبشخبط وأعدل فيها، مفيهاش أي زعل.

بتكتب كام مهرجان في اليوم؟

حسب السوق، ممكن 3 في اليوم ، يعني زي أي تجارة في الدنيا.

بتحس إن أوردرات الشغل عبء عليك؟

اه طبعا، بضطر ساعات أكتب وممكن تكون عندي مشاكل شخصية، بس لازم اشتغل، بتبقى مزاولة، بس بحاول أخلص هنا وأخلص هنا.

في حد ممكن يجيلك يقولك اكتب مهرجان اشتم حد فيه؟

بييجي يقولي حطلي على فلان، يعني زبون يجي يقولي عايز أحط على صاحبي اللي غدر بيا أو مغني على مغني، بس منافسة شريفة يعني.

في فرق إنك تكتب كلمات لواحد مشهور وواحد لسه جديد؟

 في فرق طبعاً، لو الكلمات دي جامدة أوي، يبقى حرام تروح لحد مش مسمع، عشان مش هتتسمع وهحس إني عملت كلمات ورميتها في البحر وماستفدتش منها حاجة، لكن ممكن أكتب كلام لحد مش مسمع عشان مزنوق في فلوس، هنا أنا بخسر، لأني عايز أعمل اسم برضه، أنا عمود المهرجان، الموتور اللي بيدور المهرجان كله.

مافكرتش تكتب أغنية راب؟

في ناس كتير قالتلي اعمل كده، بس أنا مش متمكن أوي في الراب عشان أنا أصلا مش بتاع راب، ادي العيش لخبازه.

المهرجان في الفرح ينفع تحط فيه أسامي ناس تبعك ملهاش علاقة بالفرح؟

لا لو مهرجان لحد معين دافع فيه فلوس ما ينفعش أحط اسم حد غريب أو تبعنا كده، اللي ينفع إني أحط اسم الفريق اللي اشتغل في المهرجان و بس.

جالك أوردر سفالة قبل كده؟

في ناس كتير بتحب السفالة، في ناس بتيجي تقولي حطلنا على البنات اللي بتروح نايت كلاب أو بتمشي شمال أو تشرب خمرة وحشيش، بس مش بشتمها، بتكلم على الحالة بتاعتها إنها بتعمل كذا وكذا، يعني مثلا "ده خلاص مبقاش في أمان هنتجوز مين ده كله بقى شمال"، بوصف الحالة بس مش بشتم بالفعل، بس في ناس بتشتم طبعًا.

ليه المهرجانات مافيهاش ألفاظ خارجة؟

عشان واصلة للناس كلها ، يعني تفتح اليوتيوب وتلاقي أباحة في المهرجان، ممكن الحاجات دي توصل للحكومة ، الواحد عايز يبعد عن الشبهات.

نفسك اسمك يوصل إنك تكتب لتامر حسني وعمرو دياب والناس دي؟

اه طبعاً نفسي الناس دي تسمعني، ربنا يكرم.                 

مين أسامي كبيرة في المهرجان كتبتلهم؟

كتبت لتيتو وبندق  وحمو بيكا والباورالعالي وغيرهم، وطموحاتي إني أكتب اغنية لشيبة أو رضا البحراوي والليثي.

إيه الفرق ما بين المهرجان الإسكندراني والقاهراوى؟

الفرق إن احنا في إسكندرية ممكن نعمل رتم أغنية قديم أوى لحد بيغني من زمان، ونكتبله عليه كلام مهرجان ونحط حكايات كتير في المهرجان. بس في القاهرة بيعتمدوا على الباور، اللي هو إني أفضل اتنطط وأنا واقف وارقص، زي أغنية العب يلا لأوكا وأورتيجا، يعني في القاهرة المهم ترقّص الناس وبس، احنا مش كده، احنا عايزين الناس تعرف الحكاوي اللي دايرة في البلد بتاعتنا، نوري الناس حالتنا.